2020年5月14日 星期四

無限 QE 的部署



COVID-19 (俗稱:武漢肺炎) 搞到全球恐慌,旅遊業,航空業,製造業,差不多係你諗到嘅各行各業都大停頓,各國政府為咗拯救經濟,紛紛啟動無限 QE (中央銀行不停買入證券,債券等等,使資金進入銀行體系,由於銀行存放大量資金,亦都需要為資金找出路,因此銀行大量借款給企業,個人等以支持實體經濟。同一時間大量減息,使到貸款利率跌至極低水平[部分國家甚至是負利率] )

由於市場上出現了大量嘅資金,但實體嘅出產並沒有同步的增加, 最後只會得出一個結果,就係你手上嗰張銀紙購買力不斷下跌(諗起都好得人驚) 雖然喺手上嗰張一百蚊仍然都係一百蚊,但係到買嘢嘅時候要用多幾張銀紙先買得到相同嘅東西。 財自唔想手上嗰張一百蚊不停縮水,想到一個方法保住佢嘅購買力,就係將動產 (現金) 轉為不動產 () 呢個世界淨係得個想字係冇用嘅,於是財自有實際嘅行動,就係某個星期日捉埋老婆一早走咗去一個大屋苑行咗兩轉,見到其中一個單位光光猛猛,企企理理,開開揚揚,樓價仲... 哈哈! 於是乎取出身上嘅支票簿,大字一揮,就係咁就買咗個不動產 la (而家想返真係好似買棵菜咁...) 希望今次我嘅投資係正確 la,我打算長線持有用來對抗通脹, 應該 10-20 年都唔會放的

大家仲諗到乜嘢方法應對無限 QE 引發嘅通脹呢? 不妨喺度彼此分享!


2020年1月12日 星期日

比貧窮更可怕的是窮人思維



一則窮人與富人的寓言故事: 在一個村莊裏住著一個富人和一個窮人,窮人每天辛苦工作,依然還是覺得貧窮潦倒,他看到隔壁的富人夜夜笙歌,根本就不需要幹什麼活,依然覺得有滋有味。 時間長了,他內心裡生了不滿嘅心理, 有天他去找上帝理論,對上帝說,你太不公平了。 憑什麼讓他那麼富有,我卻那麼貧窮,你給得我一個說法。 上帝笑瞇瞇咁對佢講,這樣吧! 現在開始我把他變成和你一樣的貧窮人,然後我送給你們每人一座煤礦,以後能不能成為富人,就睇你哋自己啦。


窮人返嚟之後,發現隔離嘅富人同佢一樣咁貧窮,佢非常開心, 窮人心想, 我憑著自己嘅努力一定能比富人原來嘅更好,從嗰日開始窮人每日朝早天光就去掘礦,然後去街上面賣錢,之後買咗啲好食嘅嘢同好玩嘅比自己的老婆同埋孩子。 日子一日一日咁樣過去,窮人嘅日子都只係比之前緊緊好少少,反觀富人佢本來就冇過住啲咩粗重嘅生活,掘煤對佢嚟講係一個好消耗體力嘅事情, 所以佢做咗幾日就堅持唔到停咗落嚟,而家佢一無所有,必須諗辦法改變呢個情況,於是佢每日去街上賣煤嘅時候,將賣煤嘅錢儲起嚟,有日佢睇到幾個年輕人喺度搵嘢做,於是佢就同嗰幾個年輕人講,我有一個煤礦,你哋可以幫我掘煤,佢哋講好價錢之後,年輕人就開始幫富人掘煤啦,富人嘅產量上升得好快,好快就賺到一大筆錢,但係富人心裏面諗,煤總有日會掘光,當掘光嘅時候自己應該點算呢? 富人於是喺街上買咗幾家嘅店舖,並且創辦咗一家煤礦加工廠,生產高質量的煤出售,利潤大大提升,這樣富人的財富又增加咗好多, 三年之後,富人依然成為富人,窮人繼續都係窮人。

從以上的故事,大家看到些什麼呢? 比著係你,你會選擇做該窮人還是富人呢?

2020年1月8日 星期三

2020年股市簡單預測



財自近期行街嘅時候,留意到街上出現嘅吉舖多咗
財自近期送外賣嘅時候,留意到市民嘅消費能力低咗(以往平均每日送到 20單左右嘅外賣,跌到近期嘅 10單左右) 
財自近期同朋友傾計嘅時候,發覺失業嘅朋友多咗(講緊嘅係中年失業,就算唔係失業嘅朋友,都有遇到公司拖糧嘅情況)

其實市況係咪真係好似財自見到咁差呢? 財自嘅答案係審慎樂觀,究竟點解有咁嘅觀點呢? 皆因 2019年中美貿易戰打得如火如荼嘅時候,恆生指數都係跌到兩萬五千點左右,而家中美貿易戰首階段嘅協議都已經達成啦,美股仲成日創新高㖭,如果唔係呢幾日美國同伊朗搞場大龍鳳嘅話, 分分鐘都已經見三萬點了。 今年比較大嘅議題係美伊嘅事態發展,英國脫歐嘅問題,美國總統大選等等,如果冇黑天鵝嘅出現,財自相信今年恆生指數應該可以創新高,35000點不是夢,財自嘅估計準唔準確,三百幾日之後大家就知道啦。 

財自近期嘅投資組合都冇乜嘢變動,主要都係收下股息,間中收下期權金咁,無乜特別嘅驚喜,所以不提也罷

財自喺新年嘅願望就係香港太平,世界和平


2019年12月7日 星期六

走佬去馬來西亞 day5



5 天早上,又係唔記得瞓到幾多點鐘,跟住就齊齊集體起身,簡單梳洗之後就一齊行動。 當地嘅朋友就帶咗我哋去地道嘅大排檔食早餐,同香港嘅飲食習慣唔同,當地人就係食呢啲做早餐。 





食過早餐之後原來當地嘅朋友幫我哋安排睇最後一個樓盤 -- Imperial Lexis [ https://www.lexis.my/hotels-resorts/imperial-lexis]

這個樓盤並非一般嘅住宅項目,而是一個酒店式服務公寓,最特別嘅地方不單止有無邊際泳池,空中酒吧,觀景台等等,而是在每個房間室內都有個別嘅室內泳池,真係認真誇張。 咁誇張嘅設計價錢當然都比較高貴啦,而家賣淨嘅貨尾單位都係1000呎以上,每個折合大約港幣400萬以上。 正值得買嘅話真係見仁見智啦。 

睇完示範單位之後我哋嘅行程都接近尾聲,係時候去吉隆坡國際機場出發。 去咗馬來西亞五天,最大嘅得著係認識咗幾位志同道合嘅朋友,並且簡單了解馬來西亞嘅發展,喺嗰度廣東話係完全可以生活,衣食住行各方面都比香港便宜,唔單止平咁簡單,仲係有質素嘅,好多時真係要你去親身了解先知道係唔係適合自己,今次嘅行程只係五天咁大把,好多嘅地方都未去過例如檳城,新山,馬六甲等等,唔知道幾時會再踏足呢個國家,希望好快會有咁嘅一天。


2019年12月3日 星期二

走佬去馬來西亞 day4



4 天早上,我哋瞓到幾多點我都冇睇到,淨係知道當地嘅朋友講一陣間約咗一位朋友食早餐呀,就係咁,簡單梳洗之後就跳咗上車去一個商場度食早餐,嗰日食嘅早餐係港式餐廳,試下喺香港食嘅肉丁蛋麵同馬來西亞嘅肉丁蛋麵有乜分別先,感覺差別不大,只係價錢比香港略平(吉隆坡嘅消費果然貴過怡保很多) 早餐過後,該新認識的朋友帶我們去看一幅位於美國大使館附近的地皮 (原來佢係吉隆坡其中一個發展商),他說這塊地下午就會去簽合約買嚟起樓高大約50層的大廈,仲問我哋香港嘅朋友喜歡什麼size的單位,現時klcc高層大廈單位平均一尺的銷售價大約馬幣1,800起跳,這數年間有升冇跌,仲要係越來越缺乏地皮起樓,簡單啲講買咗地之後未起塊地已經升值,樓花期間間屋又已經再升值,起好嘅時候間屋已經升咗幾十個巴仙(令我想起二十年前嘅深圳)

該新認識嘅朋友買嘅地皮已經看過了,財自就想去看另一塊地,坐落於 Pavilion 與及阿羅街附近一個未起嘅樓盤, 點知去到嗰塊地仍然係爛地一塊,即係要幾年後先會起好一個樓盤--Axon Bukit Bintang (http://axon-bukitbintang.com/index.html),該樓盤實際地點簡直係一流,步行行去 Pavilion 與及阿羅街也只係幾分鐘嘅路程,日後買來經營 airbnb (https://www.airbnb.com.hk/) 相信生意絕對唔錯,可惜到現時為止仍然沒有示範單位可以參觀。 既然冇示範單位參觀咁就去另一個有示範單位參觀嘅樓盤 -- Bukit Bintang City Centre (https://bbcckl.com/cn/,財自參觀該示範單位之後,完全覺得香港嘅樓宇貴到離曬譜,人哋係三鐵匯聚嘅黃金地段,六百幾呎嘅豪華裝修單位,講緊都係大約200萬港幣,香港相同類型嘅物業,起碼都過千萬... 難怪香港有更多人不滿...

地皮又睇完,示範單位又睇完,係時候睇下一些外國人生活嘅社區--MONT KIARA





財自感覺上好似香港嘅黃埔花園,外國人去到吉隆坡居住的話,基本上衣食住行都可以滿足得到,不過順帶一提這個社區裏面嘅消費一啲都唔便宜,財自與及朋友走到去當地嘅檔攤開餐,一嚟貪佢哋相對便宜,二嚟咁樣先至可以感受得到當地地道特色,就係咁樣財自就叫咗一個 辣死你媽” (椰漿飯 Nasi Lemak),真係食到邊食邊流汗(超級辣,食到我噴火!) ,另外又叫咗一個不知名的炒飯 (雖然冇辣死你媽咁火辣,但係唔食得辣嘅朋友一樣都係會畀佢 KO)

食完飯又行完街喇,係時候去我哋下一個景點 -- 雲頂高原。




我們一行六人坐車上去,大約一個多小時左右,私家車越行越高,氣溫越嚟越凍 ,轉咗唔知幾多個灣之後,我哋到達非常夢幻嘅雲頂高原,點解話佢非常夢幻,因為我哋向東南西北觀看,除咗霧之外,仍然都係霧。 吉隆坡嘅氣溫係大約30度,但係呢度嘅氣溫只係大約 14-15 度左右,著唔夠衫嘅朋友真係會畀佢凍親。 香港最高嘅大帽山係海拔957多米,呢度嘅高度係大約 1865 米左右,差不多係 2座香港最高嘅大帽山咁高,所以呢度嘅天氣就凍到打冷震。 係咁高咁凍嘅地方竟然有個非常宏偉嘅建築物,由於我哋唔會有太多嘅時間逗留喺呢度,我哋都係急不及待走去娛樂場入面打個白鴿轉,財自唔會賭博,但係都有斬獲,就係娛樂場裏免費提供嘅飲料(免費橙汁與及咖啡任飲,哈哈!)其實除咗娛樂場之外佢哋仲有非常多嘅設施及商場,當地嘅朋友一樣會迷路,一般嘅朋友都會喺度住一晚酒店才會下山,但係我哋只係喺度逗留咗大約兩個小時左右就離開,去下一個目的地--阿羅街食晚餐


坐了一個多小時的車程,終於到達我們食晚餐的地方--阿羅街,這裏是一個露天的大排檔,有各式各樣的美食,例如中式,越式,泰式,馬來式,印度式,各適其適,我哋就揀咗一間越式嘅餐廳坐低,同我哋落單嗰個妹妹仔完全不懂得與我們溝通,因為他只懂得講越南話,咁我哋就用絕招一陽指來叫餐,財自叫咗一碗香港都食得到嘅越式牛河,試下同香港食嘅有乜嘢分別,結果係佢冇乜嘢味精湯底比較清,並且完全唔辣適合財自嘅口味,河粉比香港食到嘅嫩滑一些,牛肉就係正常水準,就係咁樣我哋食咗大約200蚊港幣(相對香港都係平少少啫),食完晚餐之後我哋就返去朋友嘅辦公室睡覺了。


2019年12月1日 星期日

走佬去馬來西亞 day3



3 天早上,我地瞓到八點幾就要起身喇,點解早咗嘅? 因為原來朋友幫我哋約咗一間專門負責mm2h的顧問公司去到昨天新樓盤的寫字樓見面 (發展商原來同呢間顧問公司係friend),雖然財自自己上網了解過該計劃,但今次有專家每項細節向我哋講解,都比較清楚一些。 市面上好多馬來西亞樓盤嘅銷售都講話自己會送mm2h,原來佢哋根本就係唔同嘅東西嚟嘅,買樓還買樓,mm2hmm2h,唔好撈亂呀。佢哋講到話會送mm2h其實只係羊毛出自羊身上,市面上普遍這個計劃顧問費一般都係 8,000 9,000馬幣左右,即係話你買佢哋嘅物業,佢哋預咗八九千蚊馬幣你幫你申請mm2h咁解啫。 簡單一提,由於近期極大量嘅人申請mm2h,所以需時延長大約 9至12 個月



聽完顧問講解這個計劃之後 ,係時候就去醫我哋嘅肚仔啦,當地嘅朋友帶我哋去咗一個好出名嘅地方叫做大樹腳炸料粉茶檔,






其實財自完全唔食得炸嘢,不過見各位朋友食得咁開心,我一於食埋一份,食完之後就咳咳咳! 食完早餐之後當地嘅朋友回家執拾一些行李,準備同我哋一同上吉隆坡,就喺佢回家執拾行李嘅時候我哋喺佢屋企附近看一看當地的環境,看到一間製造糕點嘅廠,即做即賣,
又看到一間有80個款式餸菜嘅餐廳(唔記得影相 tim)。 

好啦,朋友執拾完行李同我哋去吉隆坡之前,又帶我哋去另一間國際學校 Fairview International School  (http://www.fairview.edu.my/fv_live/) 。參觀完學校之後,當地朋友帶我哋去咗一間必去嘅餐廳 -- 南香茶廳室,



杜汶澤走佬去大馬其中一個老友就係呢間餐廳嘅老闆,佢就係喺度沖白咖啡沖到發咗達啦,講番裏面啲食物質素真係非常之高,一杯兩個幾馬幣嘅白咖啡(四個幾港幣)比起幾十蚊一杯嘅是打不咖啡更加好飲,佢哋嘅蛋撻中間嘅蛋黃比香港嘅有口感,魚蛋河比較嫩滑,最特別嘅係佢哋外賣嘅涼粉,仍然用膠袋來包裝 (香港已經絕跡用膠袋裝飲品),財自出世嘅時候都已經未見過...  食完呢餐之後我哋拿拿林去到附近一個舖頭買鹽焗雞(唔係而家食㗎,係搭車嘅時候食㗎),當地朋友極力推介這間萬里香鹽焗雞鴨,所以而家食唔落都要買定鹽焗參鬚雞與及焗當歸雞坐車食


雞就買完啦,係時候向吉隆坡出發,由於怡保去吉隆坡需要三至四個小時的車程,所以我哋都坐到好眼瞓... 瞓下瞓下又塞下塞下車,塞車塞到肚仔餓,係時候搵個地方開餐喇,原來馬來西亞嘅高速公路(南北大道) 經常都會有一些畀人休息嘅地方,有好多餐廳,洗手間等設施,我哋就去咗一個不知名的地方坐低食我哋手上隻鹽焗雞,雖然隔咗幾個小時但係仍然極之好味,雞肉極其嫩滑,當歸味濃沃,鹹味啱啱好(唔似得香港嗰啲鹽焗雞得個鹹字,有機會去怡保嘅朋友一定要買呢個鹽焗雞),食完鹽焗雞之後我哋到咗朋友位於吉隆坡的公司休息(第三第四晚就在朋友嘅公司瞓覺啦,酒店錢都慳番,哈哈!)