七翻身

今年股市經過六窮月的洗禮後，唔知道七月份是否真的會翻身，大家不妨看看近10年七月份的統計數據。 過往十年，7月份錄得九升一跌的驕人紀錄:

2008  +648

2009  +1706

2010  +845

2011  +510

2012  +560

2013  +1514

2014  +1511

2015  -1469

2016  +1738

2017  +1014

2018  ???

唔睇由自可，一睇嚇親我。 7月份畀人講到係翻身月真係不無道理，近十年入面，除咗2015年股災年之外，其他年份都錄得升幅，有五年更加錄得超過一千點的升幅，真係夠曬誇張。 財自今年的投資表現實屬一般，7月份開始真係要加把勁追上去， 見到咁理想嘅統計資料，當然要大膽投資，今個月進取一些，用最強勁嘅太祖長拳出擊(簡單買入 Long Call)，希望打出漂亮的一拳(權)，至於買入什麼價位，遲些再考慮(呢度細細聲話你知，由於個市真係樣衰到爆，我都係大大聲細細注買細權咋，Good luck!)。

相關文章:

五窮月

六絕月

貪財乃係萬惡之根

在美國，一個為咗自己與及國家(暫時估計係)利益嘅人而犧牲全球其他朋友利益嘅人渣，真係無知的白痴。  一個70多歲的白人老伯伯，眼見以往幾十年前，國家風光一時無兩，全球都要睇佢哋面色， 擁有美國人優先嘅優越感，以為自己嘅拳頭大過人就可以橫行無忌，其實佢最多都可以話只是霸主(以武力人) 而唔係王者(以德服人)，這樣嘅霸主，其實同畜生沒有任何分別，你看一看非洲草原上的獅子，年輕時一樣橫行無忌，年老的時候咪一樣係會比其他的同伴離棄，然後就慢慢等待死亡的來臨。 畀你風光大半生又如何，最後一樣會死亡。無知的人哪，今夜必要你的靈魂，你所預備的要歸誰呢？

今日看到新聞，在香港一個為咗層樓而殺死長輩嘅人渣，EQ 更加低過白痴。 一個婆婆死後遺下一層樓，真係估唔到就係因為呢層樓而導致家破人亡，更不幸的是導致這件事嘅人竟然係自己嘅孫女。 其實婆婆離世留下的遺產，正常情況都係畀自己嘅老公或者仔女先，有排都未輪到 d 孫啦。 再者，如果有孫的話，這個婆婆應該都唔只得一個孫女啩。 我朋友當中有先人留下嘅財產 (主要係物業)，雖然沒有立下遺囑，但他們的幾個仔女都完全有共識有默契，不會因為層樓而爭個你死我活，其中一個因為四個兒女只有最細嘅兒子有小朋友，所以父母就決定把層樓留給第四嘅兒子，其他三個兄長，亦都同意接受這個分配。 另外一個情況就係爸爸媽媽離世後把層樓留給兒子， 該兒子沒有把層樓獨吞，雖然層樓父母已經送給他，但他樂意與兄弟姊妹分享，在我兩位朋友嘅情況看來，唔爭產畀爭產好。

食米唔知米價貴 (小米)

萬眾期待嘅同股不同權終於有著落，第一隻跑出可以做到同股不同權嘅股票就係雷軍先生創立嘅小米，究竟佢係乜東東，財自非常膚淺，只係知道佢係一間賣中低價手機嘅公司，以這些平價錢賣嘅手機嚟講，佢都算係不過不失，財自用緊嘅都係佢其下的牌子手機，跌咗十幾二十次都仲未壞得，真係比個讚佢!

如果單純以手機品牌嚟講，五十幾倍嘅 PE 上市，真係貴到冇朋友，人哋嘅生果手機功能多多，速度又快，影相又靚，PE 講緊都係十幾二十倍咋，喺呢個角度嚟講抽佢嘅 IPO，真係可以話係傻仔畀錢佢使。

如果以創新科技嚟講，五十幾倍嘅 PE，感覺一樣係係貴，睇睇我哋隻股王企鵝仔，佢喺2017年嘅 PE 都係講緊43倍咋，人哋 hold 住 5-600 間公司喎，掌控嘅資產真係多過粒米多多聲，仲要係有實質盈利貢獻，如果俾我揀嘅話真係要企鵝仔都唔要你粒米喇。

如果以同股不同權嘅角度嚟講，更加係諗都唔會諗佢。 乜嘢叫做同股不同權呀? 就係佢手上嗰張一百蚊，大過你手上嗰張一千蚊啦，咁不平等嘅條款，規佢真係想得出，港交所為刺激交投量又真係放行，上面班官員又真係懵盛盛 (政治利益集團嘅問題)。 車! 人哋外國一早都係咁啦，財自你唔好阻住個地球轉，咁人哋去死又唔見你去死，人哋嘅政治搞到出咗一個古惑老狐狸出嚟，咁你係咪又跟佢呀? (題外話，講開隻老狐狸，真係想佢快啲走)

如果以博一博，單車變摩托嘅心態抽一手嘅話，咁又冇話唔得嘅，世界上傻人多的是，總有一個比你更傻。 Good Luck!

反覆無定，謊話連連嘅總統先生

以前啲人話女人心海底針，我覺得其實總統先生才是真正的女人心海底針，反覆無定，謊話話連連嘅總統先生，導致世界股市市場急劇波動，呢頭同金仔在獅城開會，嗰頭就制裁佢，呢頭罰中興搞到佢休克，以為罰款了事之後，嗰頭又再搞佢，這個情況與黑社會綁架勒索，事主付款後綁匪仍然唔放過肉參，不知道有什麼分別?

面對一位這樣的領袖，我們可以怎樣處理與面對自己的投資呢? 很多投機玩家所做嘅不外乎止蝕行動(削肉行為)，他們的投機主要係想低價買入高價賣出，但實際情況係變成高價買入低價賣出，與他們原本的構思背道而馳。 其實面對反覆無定，謊話話連連的領袖，我們實在可以做一個佛係投資者，七十幾歲的老謊話人，他還可以掌控世界多久? 他的行為還可以延續多久? 財自估計，他不在之後相信會有數以十億計嘅朋友指罵他的行為，何須為這個老謊話領袖而削自己的肉呢? 如果今日做到坐定定喺度，數十年後你會覺得今日嘅決定係非常精明嘅，因為世界上任何嘅好資產，係會隨著時間而不斷的自我增值，你看一看幾十年前嘅玩具，郵票，好嘅股票，樓房之類，有邊一樣唔係升到價值連城? 不過我所講嘅一定有一個大前提， 就係所買入嘅係好資產。 什麼是好資產? 財自不是專家，只係知道會不斷產生現金流嘅都係好資產 (銀行，房地產之類...) 如果唔知道當今環境做乜嘢投資好的話，不妨真係坐定定喺度，乜嘢都唔做，做一個股票天然呆好過 (話之佢四萬點定1萬點都係咁)。 ^_^

支付寶用唔到 M 記 $10.00 現金券

財自係科技白痴，今日才第一次使用支付寶來付款買東西，打算賺下佢 M 記 $10.00 現金券獎賞。 由於財自的支付寶沒有連結任何的信用卡，所以今次是去 M 記現金增值。 好! 增值完 $100.00 之後，在首頁按獎賞-->再按香港麥當勞額外獎賞 $10 現金券-->立即使用，屏幕出現了二維碼付款 QR code，買了一份 $27.00 的餐，嘟一聲，完成付款，再看看扣了多少金額先，下! 點解唔係扣 $17.00 而係扣 $27.00??? 立即問問收銀員妹妹，佢話 : 這個我不知道 wor，我見人人都係咁按，你無按錯 wor..................

就係咁唔知點解用唔到佢的$10.00 現金券? 我再看看 M 記的宣傳單張，$10.00 現金券獎賞使用方法，100% 無按錯。 雖然係新科技的支付方法，但係連咁小的東西也有問題，真係要仔細想想這阿里巴巴其下的螞蟻金服是否一間安全的公司...

咁衰，都係把餘額 $73.00 兌現先，下! 由於我沒有認證，不能把有關餘額兌現，今次真係捉蟲。

牛仔死得7788

今日港股經歷了一次小股災，如果你問我見底未，我會回答你: [我點知呀! 你要問下個美國狂人好過。] 一次又一次用強暴的方法打壓全世界，整完中興，原本以為罰重款冇事咩 (其實已經重傷入 ICU)? 罰完你又再計劃整死你。 除左想整死你中興咩? 上次已經話對中國 500億的貨品開額外關稅，果頭都未開，這頭又變了 2000億美元的貨品開額外關稅，不如直接同中國講你每年送3幾千億美金比我洗下仲直接 la，不用攪咁多東西出來。 反正美國的軍事比你強，問你死未?

講完全球最惡的惡霸，等我講下香港的動物園先，話說今天香港的動物園有鱷魚出沒，咬死了一大批牛仔，大隻牛又死，未養熟嘅牛又死，今次真係有排都未有牛 BB 出世 la。 看看香港的動物園內仲有幾多牛仔僥倖生存先，嘩! 原來真係死得咁慘，連重貨區 29300-29399 的街貨數目得返 94張期指(正常有幾百，有時更多至千張)，真係可以話係清倉咁款，照咁睇鱷魚應該食飽飽掛，但係會唔會再來發惡咬牛? 真係又要問問養鱷魚果班人 la。



牛熊街貨比例

加息又嚟到，不妨睇睇投資大師的觀點

財自講嘅投資大師，當然唔係我自己啦(我只係小薯仔中的小薯仔)，我想講嘅投資大師就係安德烈科斯托蘭尼: 安德烈·科斯托蘭尼（André Kostolany，1906年2月9日－1999年9月14日），大部分時間在德國和法國度過，有德國證券界教父之稱，他在德國投資界的地位，有如美國的沃倫·巴菲特（Warren Buffett），是市場上的無冕王。他的理論被視為權威，當他說話時，德國的投資人、專家、媒體記者都安靜下來傾聽他的話語。

他對加息減息嘅觀點:

如果投資者重視企業獲利及經濟指標，就可能發生即使中央銀行多次提高利率，股票行情仍然繼續上漲。 此時，就會產生失衡現象，同時也為投資者提供機會。 因為，最遲12個月後，指數會跟上貨幣。 因此中央銀行強勢提高利率後，指數回跌只是早晚的事，而之前的氣氛越熱絡，崩盤的情況就越厲害。 誰如果看出這種失衡，便可及時退出市場，已放空的投機人士便能大撈一筆。

等我又修練一下內功，能否唔出這種失衡現象先，哈哈!

平倉 6月份的中國銀行 Short Put $4.00 獲利萬多元

話說半年前財自少量 Short Put 了中國銀行 6月份，行使價 $4.00 的期權，收取了 $0.356 x 39000 股，一共收取了 $13,884.00，當時正股的價格在 $3.88，即係有 $0.12係內在值，另外有 $0.236 係時間值，到期時正股沒有上升的話，將會接貨再收取大約 $0.2的股息。 如意算盤打不響，結果直到今天股價仍然處於 $4.00 樓上， 即係話股息應該收不到，今天是2018年6月12日，看看有關期權的剩餘金額，原來只剩下 $0.007 (只剩下原本金額的 2%)，都係唔等呢半個月，食咗佢算數，帳面利潤 $13,611.00 (未計買賣手續費) 總數持有 221天，用接貨金額計算，年度回報率 14.41%，以上只是玩樂性質，非常滿意!

勇士勝騎士 (總場數贏4比0)

財自最愛的運動就係打籃球，雖然屎波但係都鐘意打波，打法仲有啲似史提芬居里添 (周圍走，周圍射，沒有霸氣的入樽招式，但係非常實用)。原本仲諗住可以睇多幾場決賽嘅賽事，點知勇士4比0橫掃騎士，打倒騎士嘅大帝全無招架之力 (其實我唔鍾意大帝嗰啲屈機式嘅打法，以前贏波幾乎都係單靠佢一人之力，但這個世界係講團隊嘅，人人有波入梗係好過你一個人攞曬幾十分啦)。 有排都冇得再睇NBA住，咁唯有喺下個禮拜睇住世界盃先啦，又係一個又免費又精彩嘅節目。

勇士對騎士第四場精華片段

開個銀行戶口，賺取迎新優惠

開個銀行戶口，賺取迎新優惠

話說有一天，財自有個親友跟我說，我剛剛開了個銀行戶口，賺取了一萬多元的迎新優惠，你又快啲開啦，真係好著數㗎。 咁吸引等我又了解下其實係乜東東先。

原來我親友所指的，就是星展銀行的豐盛投資理財戶口，嘩! 原來而家開個銀行戶口最多可以有兩萬幾蚊嘅迎新優惠㗎，真係多個信用卡的迎新優惠多多聲喎。 不過佢啲優惠咁筍，原來都有好多門檻嘅，其中最主要的門檻就係至少要有一百萬港幣的資產放進這個戶口裏，怪唔之得啲人話有錢的人會越來越有錢喇，原來開個戶口都有錢送畀你嘅。 咁著數嘅優惠我當然唔會放過啦，更加可以獲得被推薦親友嘅獎賞添 ^_^，如果大家有興趣的話，可以看一看以下的網頁，看看如何賺取它兩萬幾蚊的迎新優惠。

https://www.dbs.com.hk/treasures-zh/promotion/TR-promo_zh?pid=hk-shortcut-trpromo

朋友安息主懷

昨天收到一個不幸的消息，有個相識多年的朋友安息主懷

昨天從其他朋友的whatsapp內容得知，一位相識了20年的朋友安息主懷了，真是悲哀。 她的年齡只是40多，應該係正值壯年的時候，但係不幸，四年前飛來橫禍，一直不停地咳嗽，咳下一個月，咳下又一個月，身邊的朋友關心她，也都叫她去驗一驗照下肺，不驗由自可，一驗就發現她是末期肺癌，為什麼一個冇煙冇酒冇粗口的人士會得到這個頑疾呢? 可能是家族遺傳，原來她的媽媽也是因這個病的緣故去世的。 這個朋友的身世非常坎坷，爸爸媽媽一早不在，她唯一的親人--她的親哥哥與她不和，她沒有結婚，數年前更加因為一次受騙，被騙去畢生積蓄並且需要破產。 雖然我朋友的人生並不如意，但感恩她能認識一班感情要好的基督徒朋友，相信他們是主給她最好的親人吧。

從這突如其來的消息，令我再一次反思人生的目的與意義: 工作? 賺錢? 愛情? 親人還是朋友呢? 不知道你們心中的答案是什麼，但在我看來，工作與賺錢應該排到包尾吧。 最近留意報章，又有一個超級富豪家族因為金錢對付公堂，之前有姓何的，也有姓郭的，現在又來一個姓羅的，富豪真係越有錢越反面，如果比我有一千億但需面對這些事情的話，我真係情願自己係身無分文的窮光蛋呀。 各位! 珍惜眼前人，親人，朋友比千億金錢更加寶貴呢。