財自辭職

眨下眼，財自揸5.5貨車話咁快就兩個月啦，對於玩這部貨車都已經沒有當初嘅新鮮感，係時候要同佢講拜拜啦。 由於唔想做夠三個月要一個月時間通知走人(新人獎金幾千蚊都唔要啦)，所以決定早上上班的時候同阿頭講: 我唔做喇! 做埋今年年尾算數啦。

回想這份工作，初頭以為做司機應該好輕鬆啦，點知原來去到要幫手搬貨上車 (OK! 我覺得都正常合理)，去到目的地要幫手尋找貨物，遇到懶惰的跟車時更加需要主力尋找... (如果係協助跟車找貨，我覺得沒有問題，但有些跟車呼呼喝喝好似老馮咁，要司機搵貨，把要送嘅貨整齊分類放到地上一份一份擺開，並且態度惡劣咁就係一個大問題 [司機搵貨，搬貨上落沒有額外收入，但跟車把貨物送最後一程到客戶手上有額外收入，這個做成分配工作的問題])，由於以上種種，原本應該係輕鬆嘅司機工作就變咗唔輕鬆嘅司機加搬運工作，人工仲...哈哈哈!

在這兩個月嘅工作期間，財自都看見一些公司嘅問題。公司現正處於投資階段，按老闆所講，每天虧損數十萬元，其實部分虧損嘅原因，財自覺得是可以避免的，例如經常見到送貨到客戶手上嘅時候，發現貨品損毀 (原因係貨倉或者跟車經常把貨物拋來拋去導致損毀)，其實每次貨品損毀，公司都要硬食有關嘅損失，再加上退貨，補貨亦都需要運輸成本，這些數目，相信每天造成數以萬元的損失。

另外，由於公司現時快速擴充車隊，造成訂單的數目增長速度遠遠落後於車隊的擴充速度，這個情況使到公司經常出現有司機與及跟車上班時該天沒有任何工作 (被安排到留倉待命)，這個情況估計令到公司每天損失不少。

此外，公司車輛的損壞情況非常之快。 由於這些車輛不是司機的個人財產，他們一般不會錫住部車，反正部車係公司嘅，如果有損毀的情況都係公司負責維修啫，就係有咁嘅心態，一部全新嘅五十鈴貨車，可以三個月就開始出現毛病，一兩年開始就可以五勞七傷。 細細聲話你知吖，有啲跟車同事發脾氣嘅時候會大大力關車門，貨斗尾門，真係整到車都難㗎。 其實現時每個司機每天都駕駛不同的貨車，如果更改這個規定的話，變成每個司機每天駕駛相同的貨車，相信比較容易發現車輛的異常情況，一個小改變相信可以節省可觀的維修金額。

最後，財自發現對公司最致命嘅問題，係前線員工 (主要係跟車) 對客戶嘅態度與禮貌，由於公司現時安排送貨的時候係上午 (10:00 am - 2:00pm) 下午 (2:00pm - 6:00pm) 以及晚上 (6:00pm - 9:00pm)，而員工的上班時間是上午9時至晚上7時，即係話如果員工跟公司的指引六時後才送晚上的貨品，正常的話他們都必須要ot才可以完成工作， ot 雖然有加班費 (司機每小時 $55.00 大元)，但是大部分的員工也不喜歡收到這份ot錢吧，就係因為呢個原因，經常出現上午或者下午就派咗晚上嘅件，冇人喺度咩? 真係話知你鍾意定唔鍾意，放喺門口，放喺管理處等等就變成係派貨員嘅家常便飯 (部分更加會代客簽收添)。 呢啲咁嘅服務態度真係使到好多客戶都唔鍾意再幫襯我哋公司㗎，唔知道有幾多客戶因為種種原因而不再幫襯我們公司呢?

以上嘅問題都係財自見到嘅冰山一角，如果公司不再處理這些陋習的話，即使你不停喺公仔箱賣廣告都係徒然。 上面講完咁多廢話，最重要嘅梗係講下會唔會買公司嘅股票啦。原來我而家做緊嘅公司喺香港係上市㗎，佢嘅公司名同而家嘅業務可以話係風馬牛不相及，我而家嘅老闆開過補習社，搞個長途電話，又搞個寬頻上網，又學人拍過電視劇，而家走嚟同超市搶生意，講到咁白你都知道係邊間啦，如果畀著係你你會唔會買這公司嘅股票呢? 如果畀著係我嘅話，由於公司嘅規模相對細小，背後沒有強大嘅金主支持，對於老闆這個背水一戰的業務，只會抱著極度投機嘅心態買入極少量嘅股票而作長期投資 (買嘅時候要預咗輸曬)。 Good luck!

喜歡工作的奴隸獸

話說財自而家嘅新工作係做司機，這個運輸行業並非做就三十六，唔做又三十六，而係多勞多得嘅行業，有些願意做的同事真係唔止三萬六，但係一些hea住做嘅真係只有一萬六。 由於這行業付出嘅體能多的話可以搵多啲銀兩，所以孕育出很多喜歡工作的奴隸獸，搬上搬落喪跑追時間，完成自己嘅工作之後更加走去其他同事身上拗單，真係做到氣咳㗎。 做得咁辛苦，放工梗係要約埋三五知己一齊去飲番杯啦(每人平均消費100至200元)，如果唔喜歡杯中物嘅同事，很多都喜歡去馬會做善事 (每人鋪草皮金額不相同，很難計算，但聽啲同事講通常都四位數一天)。財自睇完佢地生活模式，暗中慨嘆: 如果佢哋唔係把辛辛苦苦工作得嚟嘅薪金浪費喺這些地方身上，十年，二十年後相信佢哋都必定會成為百萬富翁 (假設每次賽馬日做一千元善事，2018/2019 年度有88個賽馬日計算，即係一年就做咗八萬八千元善事，十年就接近90萬啦...)

由於他們需要有足夠多嘅收入來支持他們嘅生活模式，所以很多同事都喜歡做金錢奴隸獸。  其實能唔能夠財務自由好睇個人嘅生活習慣，普普通通打工仔，每月能夠有儲蓄的話，只要有足夠嘅時間 (10年20年30年) 也可以成為小富，但係如果每個月有現金流出的話，好快就要借貸渡日，更嚴重嘅更加要破產收場，這個係能否成為財務自由嘅極大關鍵。其實賺一萬六與賺三萬六唔係成為財務自由嘅最大關鍵，而係每個月能夠有多少剩餘資金來做投資先至係重點。

財自唔鍾意做金錢奴隸獸，亦都唔喜歡去酒吧飲杯中物，更加唔喜歡去馬會做善事，只係喜歡平平淡淡過生活，睇住兩個囡囡快高長大。

辛苦工作的一天

財自做了新工一個月，本來都順順利利，揸車時享受風景，工作愉快! 但係今天畀人掉咗去第二條線(其實係輪住做沒有固定一條線)，拍住一個從未拍過嘅跟車，首先形容一下呢個跟車先，紋身人士(財自沒有歧視，以往都識一啲朋友紋一個大大個的公仔喺個身度)，極度欠缺禮貌，(請人做野從來沒有唔該，好似老馮咁)，表達能力有待進步 (大大聲，極度冇禮貌: 前面直去呀!!! 實際情況係前面係分叉路，兩邊都係前面)，不懂體諒新人唔識路，仲要大大聲聲呼呼喝喝 (XYZ!@#$%#@$)。 在此財自要讚下自己嘅 EQ，如果 EQ 唔夠嘅話真係當場同佢火拼。

由於財自唔係為咗嗰一兩萬大元而去做呢份工，遇到啲咁嘅情況要思考一下是否值得。 轉個頭想一想，這類人士沒有學歷沒有文化 (今時今日有學歷嘅人都可以冇文化... 笑左)，其實真係唔知有乜嘢工作適合佢哋，佢哋嘅工作就係講個惡字，邊個惡啲，邊個就做少啲。 今日財自忍唔住同阿頭講，我想唔做啦，阿頭了解完原因之後同我講，以後盡量都安排我唔會同自己呢位同事拍住做喇，希望我可以繼續喺度做，就係咁財自就話: 哦! 好呀! (其實財自心裏盤算應該唔會做超過三個月，因為如果做滿三個月後想決定唔做的話要捱多一個月㗎，但係做滿三個月的話有就有新人獎金數千元，原本想把一半用嚟捐贈，依家真係50 50)。 其實我而家諗緊我下次玩乜嘢工作 (揸電單車送外賣??? 定係發掘一啲輕輕鬆鬆嘅工作好呢??? 大家畀啲意見)，hehe!

大撞車

財自剛剛做了一份司機的工作一個月，今天看新聞見到一單嚴重的車禍，最少5死32人受傷。 財自不知道真正的事發原因，但估計不外乎超速，司機疲累，駕駛態度惡劣等等。 希望今次死者的家人節哀順變，在困難中能夠逆境求生，受傷嘅朋友能夠早日康復!

其實財自這一個月的工作期間，也遇過驚險的一幕，其中一單係: 話說有一天路經海怡半島的時候，財自找地方泊車，在馬路的右方慢車前行，發現了左邊有部死車 (的士) 前方有大把空位， 於是乎著死火燈慢慢轉線，由最右邊轉去中線，再由中線轉去左線的時候，突然左方有部的士超快速度行駛，原來是剛剛死車的那部的士，見我打死火燈慢慢轉左線都夠膽死畀大油出車， 嚇到我即刻大力踩腳掣，相差0.5秒就與他相撞。 其實如果的士大哥等多我兩三秒去到佢前面佢先抽頭出嚟就可以避免這個驚險情況啦，為咗搵食唔通真係嗰兩三秒都等唔切咩 (唔知佢咁心急係咪真係想去報到，XYZ!@#$%%^)。 今時今日咁嘅駕駛態度唔得㗎喇，祝嗰位的士大哥日後出入平安 (主要係希望佢唔好累街坊)。其實慢慢揸車係一個樂趣，就好似我鍾意慢慢收息，慢慢收期權金一樣，真係快都快唔嚟㗎。 安全先係最重要!

喺股票期權上面都會有大撞車嘅時候，我們要避免撞車最好嘅方法梗係唔好跟車太貼啦 (行使價唔好太貼現價)，這樣做的話萬一遇上突發情況 (股票大跌) 都有時間畀你救車 (救倉)，大家記住我嘅忠告啦 (突然覺得自己好似阿媽咁煩，哈哈)!

新聞內容:

青衣五死車禍--旅遊巴猛撞死火的士　的士司機及4旅巴乘客死亡

財自的同事

財自新公司有很多司機 + 跟車，但係每一個同事嘅工作態度都唔同，由於呢行係多勞多得，有啲抱著努力賺錢嘅心態，入到嚟公司好似玩鐵人賽一樣，朝早上貨，單拖做司機，出街周圍派貨，派得越多，收入越高，派完自己手頭上嘅貨之後，更加周圍問同事需不需要幫手(俗稱拗單)，這類同事真係一個可以打十個，真係抵佢哋可以每月搵到三四五六七萬元...

另一類嘅同事，就係hea做嘅同事，朝早慢慢上貨(捉埋司機一齊做)，出到街上，老點新手司機執貨(由於朝早上貨的時候沒有仔細分類，搵貨嘅時候好似大海撈針一樣，簡單啲講做到趴街)，老 seafood 跟車只會做最後一程嘅工作，就係把搵到出嚟嘅貨送到客人手上(由於係逐單計算價錢，搵貨嘅司機沒有任何回報，派貨給客戶嘅跟車收入更高)，仲要係慢慢hea住做，好似完全唔怕派唔切咁，點解係咁?  原來佢哋鍾意等其他同事做得七七八八，就將自己手頭上未完成嘅工作射畀佢哋，這樣的話自己就輕輕鬆鬆等收工。 幫佢嗰啲鐵人都樂意做嘅(因為逐單計錢)。

最後一類嘅同事就好似財自一樣，身體未練到鐵人一般，只係平凡人一個，但係會用盡全力，做到幾多就幾多，可惜多勞唔會多得(畀人搵老襯)，這類嘅人只係佔少數，賺錢嘅主力唔係份工身上，視工作於娛樂，每天平凡中渡過。

財自做司機

財自原本係做文職嘅工作，休息咗一年半之後回到職場，選擇了一個不是原本嘅職業 (司機) 去挑戰一下自己， 未挑戰自己之前，看一看以前跟現在嘅分別:

以往嘅同事大部分都係女性，她們喜歡扮靚靚上班。

現在嘅同事差不多清一色都係男性，部分同事最喜歡嘅活動就係打機。

以往嘅同事三五成群喜歡講去邊度食嘢。

現在嘅同事走埋一齊喜歡食煙講粗口。

以往嘅同事喜歡賺錢買花戴 (用幾個月嘅人工去買手袋等等)

現在嘅同事喜歡做善事 (俾錢去鋪草皮...)

以往嘅工作環境充滿辦公室政治。

現在嘅工作環境充滿力的表現 (上貨落貨)。

以往嘅工作充滿壓力 (畀人追數追到暈)，試過壓力大到連續幾天也沒有睡眠。

現在嘅工作充滿疲乏 (上貨落貨周圍去)，攰到回家搭上床即刻瞓著。

除咗與以往嘅工作有很多不同之處之外，財自遇到最大嘅挑戰就係唔熟路，東南西北，邊條街邊座大廈喺邊度鬼知道咩? (財自相信要用頗多的時間去認路，好彩現時可以用google map幫上一大忙) 除咗唔熟路之外，另一個問題就係財自從來都未揸過咁大部 5.5貨車，財自以往揸嘅都係綿羊仔，小型車輛等等，突然跳上一部貨車，對我來說真係一大挑戰，但係我就係鍾意挑戰，駕駛這部5.5貨車對我來說就係一個遊戲，依家有人送錢畀我玩遊戲，對我來說真係好開心㗎 (以往係寫字樓嘅工作沒有為我帶來這樣既開心度)，哈哈!  朋友每個月燒一萬元來養私家車，財自就每月收錢嚟玩  5.5，這裏帶出一個問題，就係玩物除咗喪志之外，仲會喪失金錢。 財自嘅玩物除咗沒有令我喪失金錢之外仲可以為我帶來收益  (主動收入)，雖然數目不大，但係有勝於無。 朋友仔個個月銀包唔見一萬蚊去養車，而財自個個月代一兩萬去玩貨車，條數唔使計大家都知道若干日子之後邊個會成為有錢人，邊個會成為窮光蛋喇，這個係決定你能否成為財務自由嘅關鍵因素，今次寫住咁多先，係玩貨車嘅期間遇到乜嘢有趣事等我都寫下畀大家知道。 ^_^

近月難得一見的大升市

股票市場喪升過千點，三日累計升大約二千點，真係近期難得一見嘅奇景。 既然奇景出現了，當然唔好放過呢個機會，所以今日又做 Short Call 收取零用錢的動作，當然又係揀選我有倉底貨嘅 3988 嚟做啦。

另外，不得不提我哋隻企鵝仔，前幾天才 $250.00 左右，剛剛看一看金魚缸，嘩! 已經升穿300 個大洋，無懼十面埋伏，盡情反彈，唔知隻企鵝仲有力跳到幾高呢? 真係要問問鐵閘先生同埋老美狂侵佢哋在本月尾於橡筋停傾計傾成點啦 (如果冇錯嘅話傾計時間應該係11月30日至12月1日呀)。 我哋真係要放長雙眼睇下佢哋會傾啲乜嘢出嚟。

財自返新工

財自離開了工作崗位一年半有多，而家每日嘅工作就係做咗買餸佬同埋接送大女返學放學，仲有喺屋企幫個細女換下片餵下奶咁樣，近期股市暴跌，真係看都廢事看，生活確實 Hea 到爆，原來簡單嘅生活真係會使人發悶，個人真係會越來越懶惰。 趁住細女剛剛懂得行路 (藉口嚟嘅)，係時候搵一啲自己喜歡嘅工作玩下，想下想下有啲乜嘢工作又喜歡，又可以視工作於娛樂呢?  原來財自喜歡揸車，但係養一架車確實唔化算(買車要供款，又要停車場費用，又要入油錢，又要牌費燕梳，間唔中食下牛肉乾，又要維修保養)， 加下加下一個月一萬蚊都走唔甩，有啲乜嘢方法想揸車又可以慳到呢一萬蚊皮費呢? 答案就係走去做司機，有人畀錢你又畀架車你去玩，真係去邊度搵呀，哈哈!  於是財自膽粗粗走去見工做司機，結果竟然係一見即請 (原來而家司機咁缺人手)，我仲同幫我見工嗰位哥哥仔講，人工我唔介意㗎最緊要有嘢畀我做就得㗎喇。 就係咁樣財自聽日就去返新工，揸一部我成世都未揸過嘅車 (5.5 貨車)，希望唔會有意外啦，哈哈哈!

大市短期見底反彈

股市經過近期的急插，今天終於見到大陽燭反彈 535點，保力加通道的底部出現反彈，14天 RSI 跌穿 30 (30表示超賣) 後反彈，多個技術訊號也話畀大家知道短期應該見咗底，聽到呢個消息大家係唔係好開心呢? 不過大家唔好開心得太早，因為呢個係短期的底。 如果這次是一個股災，唔會跌咗八千點就收工啩，大市唔反彈，又點會氹到啲散戶落搭呢? 投資嘅財自係唔會喺呢個時候入貨㗎，但係投機嘅財自呢? 細細哋玩下過下日晨都無妨嘅。 短期嘅目標都係20天移動平均線(現時大約在26951)，如果股市去到這個位置的話，我會食糊並且又係做 Short Call 嘅時候喇。

大眾財務--定期存款 2厘有多

香港股市已經跌了9個月左右，之前的感覺都係慢慢跌，踏入十月份跌勢開始轉急， 眨下眼已經跌咗二千幾點，在這樣嘅市況，正係消磨意志嘅時候，財自雖然睇淡大市，但也不喜歡做高風險的買跌行為，手持現金，怕手多多做左 d 錯事， 所以把心一橫，走去做一些定期存款。 去到銀行，短期嘅定期存款例如三個月左右，啲利息真係低到冇朋友，得個一厘多少少，之後走咗去一間財仔嗰度做定期存款，貪佢息口多 DD，三個月年利率 2.125%(起碼都叫做二字頭)，財自交低支票，簽幾個名，咁就做咗啦，最後個靚女服務員仲送咗十張超市禮券畀我㖭(個人主觀感覺，該服務員嘅顏值比廣告中嘅演員更高，今次真係意外嘅收穫，哈哈!)

笑說江湖--狂侵先生搞掂墨汁哥與楓葉派

笑說江湖--狂侵先生搞掂墨汁哥與楓葉派

嗰頭先講狂侵先生暫時不打七傷拳，原本只以為佢返去自己的地頭搞掂佢 D堂主香主，原來佢更加走去佢哋頭附近嘅地方搞掂墨汁哥同埋楓葉派，掃除了這兩個後顧之憂之後，專心一意來與東方強派惹事生非。

有一些老江湖想到大約30年前，日出派當年人強馬壯，意氣風發，氣勢一時無兩。 由於他們氣勢大盛，搞到當年嘅老美派妒忌，更派人走到當地打出升匯拳，日出派雖然人強馬壯，但畢竟他們只係初出茅廬嘅派別，與老謀深算嘅老美派實力仍然相差一截，老美派嘅一套升匯拳，當年真係打到日出派當場吐血，這三十年來也一厥不振。

由於前車可鑑，不得不令人想到老美派今次不單止想向東方強派打出七傷拳，狂侵先生更加想至東方強派於死地，更加楊言與東方強派的鐵閘先生不再是朋友，昔日的朋友轉眼間朋友不再。 不過江湖上嘅朋友人人皆知狂侵先生向來是謊話連連的人，所以對這樣嘅聲明沒有人感到詫異。 東方強派命運如何? 真要看看鐵閘先生如何化解。

轉數快

香港金管局推出嘅轉數快，由2018年9月30日開始可以使用，財自一於試新嘢，於第一天就試下佢有幾快。

財自先把老婆大人的中銀帳戶設定成轉數快預先收款的帳戶 (簡單一分鐘可以完成，不具體說明)。

財自嘅手機沒有裝上任何銀行嘅 app，只可以打開 O’epay 來玩玩轉數快，更新 O’epay後，多咗一個按鈕--轉數快，入去之後按 P2P，之後輸入對方的手機號碼，再按金額咁就搞掂，整個過程不用30秒， 而我老婆的銀行帳戶即時已經收到款項，真係仲快過我去銀行 ATM 度轉帳。

Aiplay，Wechatpay HK等等的支付工具也可以捆綁信用卡來付款，但是轉數快可以跳過這個過程，唔知道日後用這些轉數快來付款購物，會如何蠶食信用卡的生意呢?

Delifrance 送你50蚊優惠券

前幾天行街，路經 Delifrance 餐廳，見佢個門口有一張告示牌，好奇心驅使下去看一看，原來該餐廳做咗環保大使，推行一個 [食物金屬罐環保回收行動]，只要你將屋企唔要嘅金屬罐攞去該餐廳，該餐廳就會送你一張50元的優惠券。 財自得知有關行動後，把家中中秋節過後嘅月餅罐全部取出來，一共換得八張該餐廳的禮券，這間餐廳的行動真係值得一讚。 一方面支持環保回收，另一方面市民大眾有50元的優惠券，該餐廳又可以乘機做多啲生意，真係大家開心又環保。你話如果香港多啲這些良心老闆有幾好呢 ^_^