以往在香港朋友心目中的印象，澳門一直視為香港的後花園，因為價廉物美，沒有香港的急速節奏，食物質素又好，於是乎趁著暑假期間帶住屋企人去澳門兩日一夜旅行，順便體驗一下港珠澳大橋的便利。
當日 (20190716) 早上8時15分左右由旺角出發，乘坐港鐵到欣澳站 (成人 $15.30，小童$7.40)，再轉乘 B5 巴士(成人 $5.80，小童 $2.90 )到香港人工島的出入境大堂，抵達後順利用支付寶完成買金巴的車票 (成人65.00，小童33.00元)，過程非常順利。 之後當然係親身經歷一下金巴水上飄嘅樂趣，用了大約半個小時多少少就到達澳門了。 抵達澳門過關後發現左邊是要付費的公共巴士 (極少人排隊)，而右邊就係免費的酒店接駁巴士，財自是星期二進入澳門，所以不算太多人排隊，等了十多分鐘，免費的穿梭巴士就來了，由於財自第一站嘅目的地係威尼斯人度假村，所以中間需要在氹仔轉車，過程尚算順利。最後去到威尼斯人度假村嘅時間大約時中午十二時左右。
去到威尼斯人度假村入面，由於帶住兩個小朋友的關係所以沒有到賭場提款 (實情係進入賭場嘅朋友多數係輸錢出嚟，所以實際我係慳返唔少，哈哈!) 出面天氣30幾度真係熱到人都溶，但係威尼斯人入面冷氣合適，不會太冷也不會太熱，當中商舖極多，並且有表演又有撐艇仔嘅活動，入邊大到好似個迷宮一樣，我一家四口喺入面行下行下就幾個鐘呀，真係行到腳都跛。
太陽開始下山呀，係時候搵啲戶外嘅地方行下，就係咁走咗去漁人碼頭度 hea 下(威尼斯人度假村有免費巴士去，仲要唔使排隊添，正!)。 去到漁人碼頭簡直係兩個世界，雖然係下晝四五點到達，但係仍然熱到溶咗，去到嘅時候覺得地方冷清清 (威尼斯人嘅人口密度高佢一百倍以上)，咁樣都好唔使周圍同人逼，抵達後小朋友第一件事就係去買嘢飲(18蚊1個椰青，旅遊景點竟然平過市區，真係神奇)，嗰度冇乜嘢玩，同小朋友慢慢行咗個幾鐘影下相就走人喇，走嘅時候因為唔識搭車最後就係走咗去搭的士。
十幾分鐘嘅車程司機叔叔同我哋講澳門嘅變化非常之大，佢之前買咗層樓20萬升咗三十倍，佢買嘅車位都升咗20倍，澳門現時通街都係千萬富翁，所以澳門近來嘅物價都係幾何級數咁樣上升 (財自完全感受到，幾年前幾年後食嘢嘅價錢足足貴咗一倍)，佢哋嘅年輕人一樣係買唔到樓，所以市民嘅怨氣一樣係好沸騰，澳門政府就用一招派錢嚟解決，結果變咗年年有錢派，歲歲有金分，如果有一年唔派都幾大鑊。
好快趣落咗的士就到達酒店，原來財自嘅酒店都幾近議事亭前地， 簡單check in後，急不及待走落去醫肚仔，附近選擇都唔少，但係因為太肚餓喇所以搵咗間好近酒店嘅餐廳--康泰餐廳 (嗰條街名都好搞笑，叫做 -- 十月初五街) 揀咗個豬肋骨 (財自覺得非常好味)，叫咗個葡國雞 (財太覺得非常好味)由於財太無菜不歡，所以叫咗個清炒菜心 (一碟咁嘅菜心，要收63蚊真係，仲要加一好似貴咗少少)最後埋單二百幾蚊，但係質素真係唔錯唔錯，最後我哋竟然仲有個驚喜，就係餐廳送咗張100蚊嘅優惠券留返下次可以使用 (由於唔知幾時會再嚟澳門，所以我哋第二朝就用咗佢啦。 因為財自嘅細女太細啦，所以我哋都唔出夜街，食完飽飽就返酒店休息一下。
第二朝瞓到自然醒與及梳洗之後，帶著行李離開酒店，食過早餐加午餐後(用咗昨天嗰張一百蚊優惠券)，向住大三巴進發，我哋用烏龜嘅速度慢慢行，行咗大半個鐘左右先至到大三巴，天氣實在太熱啦，財自有少少中暑嘅感覺，所以唔去大砲台改為要匿埋去有冷氣嘅地方唞唞，就係咁走咗入去好近大三巴嘅鐘錶博物館參觀下(免費)，看見當中嘅古老大笨鐘真係嘆為觀止，1-2百年前嘅人可以整到咁仔細嘅大笨鐘，真係畀十萬個叻佢哋 。用咗一個多小時參觀完鐘錶博物館後又走去左行行右行行，行下行下行咗去新八佰伴商場(之後先知原來佢係澳門唯一嘅大型百貨公司)，繼續我哋涼冷氣嘅行程， 繼續飲飲食食，真係幾正! 開心嘅時間真係過得特別快，係時候又要同澳門講拜拜，財自周圍問人點樣可以搭車去坐金巴，原來喺葡京對出就有101x嘅巴士(每位朋友都係收 6.00)，可以直接到達港珠澳大橋的澳門口岸，就係咁財自過咗非常疲倦嘅兩日行程(帶住兩個小朋友梗係非常疲倦喇)，感受一下平價遊澳門嘅樂趣。各位如果想連酒店錢都慳番嘅話真係可以早車去晚車返，百幾蚊也可以去澳門度玩玩。
財自心想，去澳門玩兩日都攰到咁，下個月去星加坡玩四日都唔知辛苦成點喎 ^_^
