2018年世界盃

4年一度的世界盃將於本年6月14日開始在俄羅斯舉行，直到7月15日完結，一向不太喜歡足球的財自也關注起來，不知道是4大熱門之一 (巴西、德國、法國、西班牙) 奪得冠軍，還是出現令人意想不到的隊伍勝出，大家不妨在股市拼搏的同時，留意一下本屆的精彩賽事。

講開世界盃，不妨也留意一下它舉行時對恆生指數的變化吧，財自找出對上7次比賽進行期間，恆生指數的數據參考一下:

1990年6月8日–7月8日在義大利舉行，其間恆生指數上升212點(6.74%)

1994年6月18日–7月17日在美國舉行，其間恆生指數上升3點(0.03%)

1998年6月10日–7月12日在法國舉行，其間恆生指數下跌185點(2.2%)

2002年5月31日–6月30日在韓國和日本舉行，其間恆生指數下跌782點(6.88%)

2006年6月9日–7月9日於德國舉行，其間恆生指數上升1010點(6.54%)

2010年6月11日–7月11日在南非舉行，其間恆生指數上升746點(3.8%)

2014年6月12日–7月13日在巴西舉行，其間恆生指數下跌24點(0.1%)

當中錄得4升3跌，有 3次的波幅更是 6.5% 以上呢，所以千萬不要相信出面的財演講話世界盃期間股市例跌或例悶之類的廢話，以他們這樣的質數可以在各大報章或電台講廢話也是一大奇蹟，更奇的事就係有很多人相信他們，真係哈哈哈! 我們看一看今年的情況又會如何呢?

2018年6月14日–7月15日在俄羅斯舉行 (??????????)

六絕月

五月直到今天(2018-05-28)仍然未知道是否五窮月(現時估計不算窮)，且看看六月會否是六絕呢?

過往十年，六月份錄得5升5跌，分別是:

2008  -2342

2009  +643

2010  +482

2011  -1123

2012  +335

2013  -2044

2014  +211

2015  -1487

2016  -193

2017  +264

從以上數據看見，雖然上升與下跌也是 50% 的出現機率，但係當每次上升時，升幅只是幾百點的升幅，但下跌的時候，經常也是過千點，甚至超過兩千點的跌幅，所以話六絕真係不無道理。 數據看完了，那如何部署策略呢? 由於估計六月不會有超過 800點的升幅，所以我們可以根據五月份的結算價，+800點做一個 short call (e.g. 5月份於 31000點結算，做 6月short call 31800) 收取期權金，但由於 short call 風險極高，財自怕死，又在 32000 或32200 long call 做一個保護 (輸曬都係200點或400點減已收到的期權金)，贏輸有數得計，如果用十年數據統計的話，得勝率高達100% (世上當然沒有100%必勝)，如果唔追求刺激的話，這個策略可以安心放到月尾結算。

相關文章

五窮月
七翻身

2個女的生日禮物

話說我大女 5 月份生日，原本已經收到我送的單車做生日禮物，今日突然再收到另一份生日禮物(vtech超級城市)，真係開心啦!

開心事當然唔止一件啦，原來我的細女也就快 1 歲生日，當然又係收到豐富的生日禮物啦(vtech 波波池)，嘩! 買咁多禮物，銀包咪大出血? 哈哈! 原來所有禮物也是由雅培送出的，今日路經大埔萬寧，見到送的玩具咁吸引，忍唔住買咗八罐奶粉呀 (只限5月25至27日大埔超級城的萬寧，買四罐送一份禮物)

講咗咁耐，其實我係想講 vtech 303 真係一隻好股票嚟㗎，息率超過 6% 厘(派息穩定)，15年長期圖表一直向上，真係難得嘅一隻悶股，大家不妨留意一下。

我個女，今日終於識爬了 ^_^

人地話 bb 7坐 8爬，但係我個 B 就11個月先識爬，所以呢凡事沒有絕對。 人地話五窮六絕七翻身，真係要自己想一想才好相信呀。

而家每日看到 bb 不斷的成長，真係冇嘢比呢個快樂，我的 bb係咪好得意呢? ^_^

專欄鬧人

今日看報紙，看到有專欄鬧人，真係睇到一樂也，至於他鬧的係邊個，你地明白的，哈哈!


神仙丁:  嗰種見升叫升、見跌叫跌嘅分析，仲要事後博人唔記得，再扮食晒所有浪嘅做法，這種厚顏無恥實在令人鄙視。

原文:

會師中環：財演又被跣一鑊

冇股票可以收股息

財自本身有些少中國銀行的股票，到七月的時候將會除淨，收取丁點兒的股息，真係小到冇朋友，唔夠生活開支，點算? . . . . . . . . . .  好啦! 我就用期權來收取股息，由於今日的股價在大約 $4.20 左右，Short Put 7月份 $4.20 有 $0.22，相比它的股息 RMB0.176 輕微高出些少，真係沒有股票也可以收到股息 ^_^。 仲係嫌少喎，如何辦呢? 這樣，不如直接買入正股，買的時候股票在 $4.22，又可以收取 RMB0.176股息，都係嫌少喎，又可以點賺多啲息呢? 這樣不如在上方 $4.30 Short Call 七月份的期權，收取 $0.085 的期權金，這樣的話一共可以收取原本的股息，又可以利用期權收取七月份的 Short Put 期權金，再加上新買入的股票又可以收取股息，仲可以收取七月份的 Short Call 期權金 ，加加埋埋真係都好和味下。

買咗咁多貨，萬一下跌的話咁點算呢? 兩個多月時間有機會再做過 Short Call。 咁如果升咗又點呀? 好簡單，食埋當中的差價，賺得更多。   以上說話，只係財自心裏所想，有沒有行動呢? 哈哈，唔話你知!

畢生難忘的母親節

話說財自今天一如以往，參加星期日的主日崇拜，下午一時剛好崇拜完畢的時候，接到財自媽媽的來電: 財自，你爸爸的情況不是太樂觀，他剛剛去看醫生，醫生說他可能是心肌梗塞，已經幫他召喚白車，送他去屯門醫院急證室了...

突然間，真係晴天霹靂，雖然家父有多年的糖尿病紀錄，但係以往一向控制良好，除此之外，沒有聽見過他有什麼病痛(近來常常咳嗽除外)，聽到媽媽這個來電，當然第一時間飛去屯門醫院啦。 說時遲，那時快! 轉眼之間已經去到屯門醫院的急症室，看到財自爸爸坐在輪椅上，靜靜地等待醫生的檢查，心電圖，X光，抽血等等等等，除了咳嗽之外，看見他沒有異樣，總算得到安慰。  於是乎，等阿等，等阿等，一等就是幾個小時，終於可以再看醫生了，醫生跟我們說他沒有心臟病你們可以放心，也檢驗不出肺部有什麼大問題，他胸口痛的主要原因，是因為他近來常常咳嗽，咳到入面都發炎了，除此之外， 他血壓非常之高，這個需要注意一下飲食 ，就係咁樣，就過了一個難忘的母親節。

原來財自爸爸怕我們擔心，竟然糖尿病嚴重了，患了高血壓也沒有告訴我們，經過這次的經歷，就向財自爸媽再三叮囑，他們要注意一下飲食。

祝大家母親節快樂! 身體健康。

維修手機

大約半年多之前，財自買了一部新的手機--華碩 Zenfone 3，手機牌子上，他絕對是稀有品種，但是由於財自使用的電腦也是華碩的出品，使用了4-5年，感覺完全新的一樣，好使好用，所以他出品手機，財自也貪新鮮，貪便宜買了一部使用，$1,100.00 左右，但係質素絕不失禮，於是乎開開心心用了五個月。



五個月之後突然出現嚴重毛病，(1)手機螢光幕自動按鍵，在沒有接觸螢光幕的時候，手機上就好像你按了掣一樣不停跳動。 (2) 開關掣完全沒有反應，不論你是按三秒還是三分鐘也一樣。 唔係掛，我部手機買咗五個月咁快就壞咗，好彩我買嘅係行貨，拿著發票走去維修，該維修中心，座落在深水埗地鐵站附近一座五十年左右的舊洋樓身上，如果唔係你對左個地址幾次，你都唔相信你去咗一間手機維修中心，上到去，真係同住宅沒有分別嘅維修中心，一個年長的接待員，目無表情地問你取機定維修，於是乎我就跟他說我部機壞咗呢度呢度，跟住他就熟練地發出維修單據，並向我說明，你個情況大約等五六個星期啦，(財自心想: 唔係呀話，等五六個星期咁耐，冇辦法，肉隨砧板上)於是乎等呀等，等呀等，等到頸都長，足之到咗第五星期，心急的財自打電話去維修中心問情況，嗰個年長接待員跟我說，係喎等咗五個幾禮拜喎，我幫你追追呀， 有消息的話我都會打電話通知你。 於是乎又過咗一個禮拜有多，財自見佢冇聲氣，於是又再打電話去問情況啦，嗰個接待員嘅答案跟上一個星期基本上係一模一樣，分別只係改咗，係喎7個禮拜喇喎，我幫你追追呀。 咁嘅情況，財自梗係慶啦，於是乎用責備嘅語氣怪責他們XYZ!@#!@$#@%$%$ (我係斯文人，絕對唔會講粗口)，再過多一星期之後，他們終於來電跟我說，你部電話已經維修好喇，可以隨時準備來領取，我當然急不及待即日就去取手機啦。 螢光幕壞嘅地方真係整好咗，開關掣又真係搞掂咗，好嘢! 但是回到家中仔細查看的時候，發現手機竟然沒有聲音，初時我估計係設定嘅問題，於是乎左按右按，左 set 右 set，但係最後我都搞佢唔掂，無法 la，第二日再去維修中心跟他們說明，今次換來嘅係一個後生哥哥仔，他笑著口跟我說，你放低部機喇，我將佢交去廠做維修，當時財自梗係發爛渣啦，你唔係又要我等兩個呀話，之後哥哥哥仔在維修單上寫咗 Urgent! 我真係極度無奈嘅只有再等，無聲的等，無奈的等，經過十天八天之後，終於又打電話嚟同我講，你部電話整好啦，可以攞單據嚟取手機啦 (財自心想，我都買咗部新手機喇，你鍾意的話再維修耐啲啦) 。 財自今天終於有心情去深水埗嘅維修中心取回手機，並向自己承諾，日後不會再購買該牌子的手機了。



究竟財自買咗部乜嘢新手機呢? 提示: 它好快會在香港上市， 並且很大機會是第一隻同股不同權的獨角獸股票 ，有看開新聞的讀者們，應該不難估計是那品牌吧。 我自己也預計將會抽該公司的新股，至於如何申請，看看到時的投資氣氛吧。




華碩 Zenfone 3 介紹

一次不愉快的用膳經歷 52

話說財自節儉，除非有事要做或者係老婆唔得閒煮飯，否則的話多數時間也會在家中用膳，有一次中午在街上，到了食飯時間，肚仔打鼓，當然走去醫肚啦。 財自獨個兒找飯吃，找到一間平靚正的快餐店52號仔，走去食一個叉燒四寶飯先，由於該鋪不是旺區，很快就有得吃了。 食第一啖飯，啲飯硬咗少少，Ok唔緊要，偶然一次失水準由佢啦，點知食第二啖嘅時，嘩! 唔係掛! 原隻小強成隻上(1.5cm 長左右 la)，當時真係晴天霹靂，口裹果啖飯真係吐都吐唔切，之後梗係捧住碟飯去廚房更換啦，當時心想:可能其他叉燒都有小強，都係換過一碟最安全嘅食物--粟米肉粒飯先，就係咁財自就換咗一碟粟米肉粒飯，嗰個廚房姐姐之後仲送咗杯咖啡畀我飲，仲不停講sorry㖭，之後財自返迴座位繼續食， D 飯繼續係好硬，啲粟米肉粒飯比平時嘅水準差一大截。 如果再係咁，就算請幾多個大明星幫佢賣廣告，有多少個窩心的送餐服務也於事無補，希望這只是個別例子 la。

看一看它的股價，剛剛好 $30.00 大元左右，如果你唔怕剛才財自說的東西，的而且確可以買入長遠收息。

股票咁高風險你都買? 跌落嚟渣都冇喎

冇幾耐之前有個朋友問我，點解你可以唔使上班工作就可以生活? 你啲錢喺邊度嚟㗎? 我向他的回答是因為我投資股票與期權等等賺取生活費。 我朋友就說，股票咁高風險你都買? 跌落嚟渣都冇喎。 期權? 我更加唔知係乜啦，這些超高風險的東西，唔好搞我。 就係這個語帶否定嘅語氣，結束了我們的簡單對話，之後轉移話題。

由於我這位朋友多年前因為投資股票失利，他就認定了買股票是不能賺錢的東西，更加談不上會因此發達。 此後凡是與股票有關的東西，他就認為是騙局，是不能接觸的東西 。 其實投資股票有賺有蝕，非常正常，不過有人因此而怕怕(好似我這個朋友一樣)，亦有人因為投資失敗而更多了解股票是什麼，越是研究，越長知識，最後當然就變成長勝將軍啦。 究竟你係一個斬腳趾避沙蟲嘅人? 還是一個遇到失敗而迎難而上嘅人呢? 其實這個心態或多或少決定了你日後嘅投資回報，如果你因為早期嘅失敗而放棄了日後嘅賺錢機會，這是多麼的可惜。 如果你因早期嘅失敗而更多裝備自己，恭喜你，你離成功不遠了。 如果你看到我這篇文章的話，我也相信你離成功不遠了，因為我沒有名氣，而你仍然會找到來看我的文章，即係話你會係一個努力尋求賺錢的人，我相信你會成功。 加油!

香港人的母語係廣東話

講多無謂，去片:

令人失望的平安好醫生 1833

話說財自抽中了四手平安好醫生，昨天還期待著升20-30%的機會。 因為與朋友(數十年前的小學同學)去下午茶，吃了豐富的餐蛋麵(普通到爆的餐蛋麵)，齊齊講下湊仔 / 女經，雖然帶了手提電腦出街，打算在4:15 的時候暗盤放出，但不知什麼原因，在街上使用電腦死機，冇辦法沽出，好! 回家再算。

下午茶後回到家中，已經是 5:30，暗盤時段仍然未過，於是打開電腦看看，部電腦唔知乜嘢事，返到屋企又可以正常操作，點知個價已經唔見咗幾個大洋(幾個大洋 x 4手已經是 $1,600.00)，原來這餐下午茶，足足價值1,600.00 大元，真係好肉赤，眼見昨天大市急跌，平安好醫生的價錢當時是 61元，扣除利息開支與及手續費後，仍然有一張金牛的利潤，都係怕夜長夢多，到第二天之後潛水收場，於是乎在61元沽出獲利。 現在看看時間是 2018年5月4日下午3:50，平安好醫生剛剛在招股價上面 (54.80)，如果昨天冇放貨，現在就是虧蝕了利息與手續費了。 雖然與期望有極大的落差，但總算袋了一餐茶錢，看來今個月真係窮窮哋的五窮月啦。

捷榮國際，這杯咖啡飲唔飲得過?

話說財自喜歡飲咖啡，雖然未至於有陳豪嘅狂熱，但都叫做每天最少一杯落肚，原來不論去到那間餐廳用膳點杯咖啡，絕大部份都係幫襯這間老字號--捷榮國際控股。 看看他的客戶群，真係一啲都唔失禮，當中包括麥當勞，大家樂，大快活，吉野家，翠華，7-11，太興，意粉屋等等，單計快餐店生意，原來佢已經佔左市場大約八成嘅市佔率(再增長空間是否有限?)，真係咪話唔恐怖，究竟這杯咖啡飲唔飲得過呢?

話說原來這間捷榮國際，曾經在星加坡上市，直到2013年私有化，當日除牌時的市值大約4億港元。 5 年後嘅今天，走到嚟香港 ipo，如果成功以上限定價上市的話，市值接近16億港元，原來魚過一過塘真係會大咗㗎。 除此之外，今次ipo涉及大股東賣出舊股，當中涉及金額接近三億元港幣。再看看他近來的財務報表，2015-2017年期內溢利分別3900幾萬，6500幾萬與及 4800幾萬。

看完以上的資料，我真係情願飲杯美國嘅事打不啦。