香港人壓力高易爆煲

今天早上去 M記吃早餐的時候，聽到有個男人用粗言穢語，喺度xyz交叉個職員，話佢係傻嘅，超級大聲，全餐廳嘅人都聽到，仲要同其他客人說，你哋唔敢鬧佢，等我嚟鬧佢，想打佢添呀...  (財自估計: 該男人精神有問題)

今天下午去美心mx 吃午餐的時候，隔離枱有位男士，佢份餐食咗兩啖，飲完杯凍飲跟住就同隔離位小姐講，我行開一陣，你幫我睇住個餐唔好畀人收咗呀。 等咗幾分鐘都唔見過男人返嚟嘅? 原來嗰個男人走咗去取餐處取另一個餐，去咗另一張枱度繼續佢嘅午餐... (財自估計: 這個男人精神是有問題或是故意欺騙餐廳，趁人多的時候食免費午餐)

今天看到一單新聞，話說天水圍東華三院李東海小學懷疑因工作壓力關係，在學校內墮樓身亡。 該位老師壓力爆煲，唔想谷到精神病，選擇了輕生...  其實在我看來，死嘅不應該是這位老師，而是向他施展無窮壓力嘅人渣。(財自遇過類似嘅人渣，完全明白這位老師嘅壓力，但係死真係不可以解決問題，你死咗，呢啲人渣仍然坐在權位，仍然會有一批無辜嘅人受到壓力，如果你真係無法承受這些壓力的話，退一步真係海闊天空)

財自想法: 唔想做人谷到精神病又或者係壓力爆煲的話，最好就係揀一啲自己興趣嘅工作啦! 人生嘅事情不單止係工作賺錢，有時都要培養下自己嘅興趣，甚至乎係靈性上嘅修為。我都係比較喜歡做一個開心嘅香港人啦 ^_^

相關新聞:

欠債而生的家庭悲劇

這幾天看報紙, 重重覆覆都看到有家庭悲劇 (主要也是因欠錢嘅關係而輕生), 而家嘅市況上升幾千點佢哋都可以輸大錢, 仲要賠上自己嘅性命,  真係令人拗爆頭, 財自估計佢哋係向下炒或買了衍生工具, 其實投資炒股已經唔係咁好啦(唔好嘅原因係絕大部分嘅散戶都會輸錢), 佢哋仲要向下炒或買了衍生工具, 真係笨...  唔單止輸咗自己啲錢, 輸咗自己條命, 仲要輸埋家人條命 (其實佢哋有冇搞錯呀, 自己死都要搵埋屋企人一齊死XYZ#@$&) , 真係...  財自奉勸大家唔好以為自己好叻而去炒股, 千萬千萬千萬唔好再炒股票啦。

相關新聞

越嚟越鍾意揸車嘅工作

財自做咗電單車送外賣嘅工作個多月，覺得愈做愈輕鬆，愈做愈好玩，日日去唔同嘅地方遊車河兼且賺外快，輕輕鬆鬆又一天。 人到中年，而家先找到自己喜歡嘅工作，真係好遲呀，但係遲搵到總比冇搵到好呀，有 D 人奔波勞碌大半生，為左搵兩餐頻頻撲撲，做到隻積咁嘅樣...    回想以前做寫字樓嘅工作，日日做到天昏地暗，120%嘅付出，只係得幾十 % 嘅回報，工作壓力又大，可以捱到十幾二十年，真係要畀個叻自己。 其實財務自由的定義每個人也不同，有啲人家財萬貫 (身家數以億計)，但係仍然要做一啲自己唔喜歡做嘅工作，另外有啲人身家唔多，但係就做一啲自己好喜歡嘅工作，究竟邊一個人先係自由呢?

股票市場經過一月份的急升，現在開始出現正常的回調，究竟係會衝上三萬點? 還是係跌到去二萬七? 呢個真係天曉得。 身邊嘅朋友很多都係每日估升升跌跌幾多點，升穿阻力會升幾多，跌穿支持會再跌幾多等等等等，有啲會喺度追蹤大戶喺乜嘢位入，乜嘢位出... 呢啲咁高技術含量嘅玩意，財自自問真係唔識點去玩，我淨係識得玩一啲好簡單嘅嘢，就係日日坐喺度收錢啦，大市急升嘅時候我咪做下short call囉，大市急跌嘅時候我咪做下 short put 囉，大市唔升唔跌嘅時候我咪收下股息囉，簡簡單單做下自己喜歡嘅工作，開開心心做下人生嘅快樂事，我就係咁簡單㗎啦。   

最後送一啲小禮物畀大家，就係第一次喺我公司訂餐嘅時候輸入這個優惠碼: lowbboss，付款嘅時候就付少50蚊啦，呢個真係好抵架，仲有條片比你地睇下 Tim，好好笑架 ^_^

大市升得唔錯，係時候又入 Short Call

經過陰陰沉沉嘅2018年，股市由高位下跌接近9000點，當各個財演講個市會跌到幾多幾多點嘅時候，踏入 2019年一月，股市就嚟個似樣嘅大反彈，升咗足足二千點以上。 有啲朋友話係牛市已經嚟咗，有啲朋友話係大跌之後嘅反彈，財自不懂預測大市，只係知道個市升番咁上下嘅時候，可以入啲 Short Call，今日趁住股市升到兩萬八千點嘅時候，Short Call 左 3988 @$4.00，收返幾千蚊零用錢使下，唔知呢幾千蚊係唔係會袋袋平安呢? 四月尾嘅時候自有分曉。

財自係一月頭嘅時候買咗部電單車，用佢嚟兜風 + 送外賣，玩咗大半個月，發覺原來揸電單車收入都唔錯 (每小時大約有 $100)，仲要係鍾意邊日返工就返，都幾開心㗎。 識得有位朋友，新年期間做四日送貨嘅工作(每日大約工作8至10小時)，收入竟然高達萬元，即係每日2000幾大元呀，果位朋友即刻請幾日假走去搏殺，真係識得搵錢 ^_^ 。

下個禮拜就係農曆新年，預祝大家財運亨通，個個賺錢賺到豬籠入水。 財自梗係放多自己幾日假上去大陸休息一下啦 (實情係上大陸跟親戚賀年)，哈哈!

財自送餐 (漏晒奶)

財自今日揸車送餐，畀我送到一份飲品加雞翼，喺我取到飲品嘅時候已經心想咁樣嘅包裝會唔會去到客人手上已經漏晒出嚟呢? 我即時用盡我嘅方法，就係加咗塊紙皮固定飲品的位置，唔會在我的車尾箱內搖嚟搖去，但係最後送到客人手上嘅飲品都係漏曬出嚟。 個客人收到佢叫嘅外賣的時候，同我講點解杯野係漏嘅，聽到客人咁樣講我梗係用九秒九向公司匯報啦，打開公司嘅手機 app，與同事匯報，同事說: 請稍等 (1 分鐘後)，同事問我係邊杯野漏呀? 我用九秒九嘅速度回覆，(1 分鐘後) 同事又問我咁其他食物是否正常? 我又用九秒九嘅速度回覆: 其他ok， (1 分鐘後) 同事跟我說，他現正安排與餐廳溝通，(3 分鐘後) 餐廳方便願意再出番一杯飲品，而我們公司會安排另一位車手負責把這杯飲品交到客人手上，跟住到我問返同事，現在這個情況，這個是現金單，我是否向客人收取全數? (1 分鐘後) 同事又回覆我，係呀! 你可以向客人收取全數現金並通知客人稍後會有另一位車手把這杯飲品再送到你手上。

在我與客戶服務的同事溝通嘅同時，客人手上原本漏咗五分一嘅飲品，現在已經漏咗五份四啦，原來係嗰杯穿窿 (我都冇眼睇)。 這個客人 (完全普通話) 都好脾氣與及好有耐性，遇到個咁嘅情況都願意先付出全數現金，再等另一位車手送一杯飲品給他 (比個讚佢)。

送餐外送平台送一份 $100.00 的餐，然後需要安排兩個車手送給客人，左計右計這單生意公司肯定蝕本。 其實我到而家都唔知外送平台如何賺錢? 這個燒銀紙嘅遊戲，唔知可以玩幾耐呢? (間間都揸住幾百億慢慢燒，哈哈!)

另外，由於股市未有大跌至我心水的低位，所以我這半年也是按兵不動，只係間唔中收下股息度日，如果佢真係跌到20000點邊緣的話，我先至會出手入貨。但係睇而家嘅市況，又真係幾難見 20000點喎，咁唯有繼續等待啦，反正時間係我嘅朋友。

股市大上大落，最好乜都唔好做，咁無聊咁悶嘅日子財自出返架車去兜風

踏入新嘅一年，股市急跌又急升，如果睇得唔夠準嘅朋友，非常容易被大市打到左一巴右一巴，財自自問冇短炒嘅準繩技術，唔喜歡出出入入，所以冇畀人打完一巴右一巴。按現時嘅市況，都係等到有非常明確嘅信號才入市 (退市) 好，這樣我喺度等什麼呢? 等佢跌到2萬點囉，到時真係唔理三七廿一，去股票市場到大掃貨。 20000點見佢唔到點算? 咁咪收住息先囉，再唔係等大市反彈做下 Short Call 收返 d 零用錢洗下，唔講唔知，原來我尋日都做咗 1398 Short Call，小小哋收返千零蚊洗，開開心心等收錢。

等待大市超級大跌或者超級大升嘅時候，財自嘅新車終於到手，可以去兜風賺返啲零用錢，今日走咗去荔枝角玩咗轉，來來回回做十單，咁就有幾舊水洗下啦，哈哈!   不過原來這個遊戲都唔易玩，原來真係可以玩到單接單冇得停手，唯一可以抖嘅時候就係去到餐廳等出餐 (最耐嗰間等咗三四個字呀)，各位朋友，下次叫外賣嘅時候真係欣賞下外賣員嘅付出，尤其係超級炎熱，超級寒冷與及下雨的日子，我未做過都估計到超級辛苦呢。

嚟緊就嚟農曆新年，預祝大家賺錢賺到豬籠入水，開心到好似我個女睇 Peppa Pig 一樣咁開心。 ^_^

財自下個工作 (遊戲) 計劃

財自唔玩5.5嘅貨車，咁之後有乜嘢玩意呢? 畀大家一啲貼士，都係同車有關嘅，不過唔係四個轆嘅車，而係兩個轆嘅電單車。

這個行業喺香港歷史唔係太長，都係近幾年先由外國引入，分別係熊貓先生，袋鼠先生，同埋優步先生 (唔知點解冇一間係由強國引入) 。 原本一直被視為沒有前途嘅工作，透過手機應用程式，搖身一變就變咗一個新興嘅行業，如果你勤力的話收入真係好過朝九晚六嘅寫字樓工作，所以近年都吸引了一大班人士加入。

佢嘅業務主要係聯繫餐廳與食客，如果一間餐廳與佢哋嘅平台合作的話，正常情況生意都會有增長，餐廳一般需要支付營業額嘅 3 成作分成，而自己本身亦不需要外置太多嘅硬件(由外送平台給予簡單嘅電腦安裝及基本的說明即可)，所以近來有數以千計嘅食肆都願意與他們合作。

香港的外送平台的大阿哥係戶戶送 Deliveroo (袋鼠) 奪得，他佔了大約 60%嘅市場佔有率，真係好巴閉。 既然係市場嘅大阿哥佢當然吸引一班車手為佢賣命，但係2018年初嘅時候由於減工時嘅關係已經有一次大罷工，嗰次罷工之後公司承諾唔會扣減，但係結果係...

今次12月更改工資嘅計法，由以往嘅時薪計算改為按每單計算。 為何會有這個安排呢? 從他們自己嘅網站所講嘅原因是: 距離越遠，所需的時間就越長。距離計費方式給予您接受遠距離訂單，賺取更多費用的機會。 究竟實際嘅原因是什麼呢? 大家心照啦。

簡單總結: 每單最少 $50 (12-14 , 19-21 保證每小時最少有 $75.00)，其他時間每小時有幾多單，聽天由命。

至於另一間熱門嘅外賣平台 foodpanda (熊貓)，佢嘅計算薪金方法就簡單得多 ($75 / hr +  每單 $15，即係話如果你每小時做到 2單的話，你就會有 $105 收入) 聽落係咪好似吸引過 Deliveroo 呢? 其實未必㗎，因為佢會限制咗你上線嘅時間，所以邊間收入高啲，我未做過真係唔知道呀??? 希望有啲喺入面做緊嘅朋友話我知啦。

 最後另一間相對冷門嘅外賣平台就係 Ubereats，大家都知道 Uber 原本提供租車服務，唔知係唔係佢哋啲司機畀人告得多，公司都開多一個賺錢嘅渠道，由於佢進入市場嘅時間相對較短所以市場佔有率不高 (即係好少人落單啦)，所以我暫時比較會小考慮加入這個平台。

財自在 2018年尾已經落咗訂買新嘅綿羊仔，喺2019年頭幾日就有車攞啦，到時幾時有得揸車送外賣兼且兜風就話畀大家知啦。 Happy new year!