暑假去旅行--新加坡
近日香港的氣氛使人不安，今次就帶埋阿爸阿媽老婆大女去新加坡玩4日抖一抖氣，感受一下這個城市國家的魅力。
由於財自係電腦白痴，今次用 Expedia 買機票訂酒店都用咗我好多時間，要比較下唔同航空公司嘅航班時間，最後揀咗國泰航空早上8時10分起飛嘅機位，實行早機去晚機返。 (國泰航空加油!) 除咗揀航空公司之外，也需要揀住哪一間嘅酒店，財自就揀咗一間近地鐵站附近又有商場，喺小印度區附近嘅 Aqueen Hotel Jalan Besar，主要都係因為貪佢夠平，同埋佢都算乾淨企理。
去到出發當日，由於係8時10分起飛的關係，我們一行五人六時左右已經到達機場，人到中年都要去學習一些新的事物 (自助辦理登機)，真係唔知點解我整呢整去都整唔到，最後係財太幫我處理，原來我放 passport 嘅位置不準確，哈哈!
飛機上面嘅電影真係夠曬多選擇，財自揀咗一套喜歡嘅電影 (復仇者聯盟 3 -- 無限之戰)，睇到我唔捨得走。 期間空中小姐不停為我哋加飲品與及食物，飛機上面一啲都唔覺得辛苦反而係一種享受。 好快脆四個鐘頭嘅機程話咁快就到。
落機之後，好順利咁樣攞到行李並離開機場，由於財自心急嘅關係，好快趣就走咗去的士站坐的士去我哋嘅酒店check in，期間的士哥哥仲問我哋香港而家嘅情況係點 (政治嘅嘢唔喺度講啦)，20分鐘嘅車程就順利到達我哋的酒店，簡單交低按金上房放低行李之後就立刻找吃的。原來酒店附近已經有非常多嘅食肆，真係多到唔知食乜好，最後揀咗一間拉麵嘅食店，財自叫咗一大碗蕃茄牛肉拉麵 (超級好味，唔似得香港嗰啲老千拉麵咁多味精，人哋係新鮮即場拉出嚟，而且份量十足，每碗盛惠 SG8.8)。
飽餐過後就開始我哋第一天嘅行程 -- 濱海灣花園 (十多年前去新加坡嘅時候都未有這個花園，值得一去嘅靚公園)，輕輕鬆鬆又過幾個鐘，由於有老有嫩嘅關係，所以六七點左右就回程到位於酒店附近嘅 City Square mall 吃晚餐，晚餐過後沒有什麼別的地方去，只是回酒店休息。
第二天早上9時左右出門口，走去出名嘅阿坤咖椰吐司食早餐，財自叫咗一份kaya吐司套餐，財自真係超級大鄉裡，裏面有一碗盛載兩隻生雞蛋的東西，財自心想:有冇搞錯呀付出咁多錢畀兩隻生雞蛋我食，隔離枱嘅婆婆見到我哋來自香港，同我哋講這一碗生雞蛋唔係就咁食㗎，係畀你用嚟加豉油加胡椒做醬汁㗎，一個80多歲嘅婆婆教我哋點樣去食新加坡嘅地道美食，講真這份kaya 吐司真係非常美味，唯一美中不足嘅地方就係唔係好夠我食，哈哈! 所以就走咗去當地嘅麵包店買新鮮嘅麵包。 邊走邊食，懷著勁開心嘅心情去環球影城跟小朋友一齊放電。
由市區去環球影城真係好方便，可以乘搭 MRT 列車到 Harbourfront 站(Vivo City) 再轉乘Sentosa Express 就可以到達。 新加坡嘅環球影城係全世界最細嘅，相信比香港嘅迪士尼更加細小，如果唔玩入面嘅設施，正常步速幾個字就可以圍繞環球影城走一個圈。 由於係平日嘅關係人流不算誇張，入面大部分嘅設施排隊也少於一個小時(好多都係等半個鐘至九個字)，由於財自一家有老有嫩，所有緊張刺激嘅機動遊戲一律免問，以下係財自有份去玩嘅設施: (四粒星星或者以上嘅就真係值得去嘅)
史瑞克4d劇院 (****)
恐龍騎士 (***)
變形金剛3d對決 (*****)(但係太刺激我個女睇到喊)
魔法轉輪 (財自太太與及女兒玩 **)
旋轉飛盤 (***)
木箱漂流記 (***)
朱利安國王旋轉舞會 (***)
晚上六時左右就離開環球影城往 Vivo City 進發，點解要去Vivo City呢? 因為嗰度原來係新加坡最大嘅商場，同埋係坐 MRT 嘅必經之路，呢度細細聲講你知，財自其實去巡視業務，原來財自買咗極少量 Mapletree Commercial Trust
(股票編號n2iu) 嘅股票，買入價 SGD1.65，現價大約 SGD2.26，哈哈! 嗰度嘅food court 真係唔講得笑，感覺上比香港各個商場嘅food court也精彩，裏面東南亞國家嘅美食真係多到數唔曬，有很多係香港少見嘅特色美食，財自就叫咗肉骨茶，印尼嘅炒飯，印度嘅咖哩薄餅餐等等，財自食咗嘅食物覺得比香港可以食到嘅更加美味，而且價錢仲非常非常化算(如果鍾意食這裏特色美食嘅朋友真係不妨搭飛機嚟食幾天都值回票價)，晚餐過後簡單行下商場就回酒店休息啦。
第三天早上也是九時左右出門口，喺酒店附近吃過早餐之後向著河川生態園出發，財自選擇嘅交通工具係乘搭 MRT 去 Choa Chu Kang 站轉乘 927 巴士，落巴士後就直接到達新加坡嘅動物園 (河川生態園在同一個地方)，[小插曲: 財太喺圖書館借來嘅新加坡參考書，教我哋搭 MRT 到 Woodlands 站，再加九分鐘車程就到，到 Woodlands 後我哋根本發現係唔可能嘅，因為書上面所講嘅九分鐘車程原來係自己開車嘅行車時間，真係豈有此理，浪費咗我哋半個鐘，邊本書我唔想得罪人哋唔開名啦] 到達新加坡動物園 / 河川生態園入口嘅時候就係一個 Food Court，又係畀我盡情吃喝嘅時候 (與 Vivo City 嘅 Food Court 比較真係有少少失色)，午餐過後我哋就進入河川生態園。 河川生態園入面各式其色嘅水中動物與海洋公園嘅有很大分別，當中比較特別嘅係有活生生嘅食人魚，可以發出600伏特嘅電鰻，非常稀少嘅娃娃魚，體型十分龐大嘅海牛，近距離接觸大水瀨。 陸上方面不是太吸引，有我哋嘅國寶熊貓 (可惜當日只能夠透過閉路電視看見他睡覺...)，一些細小嘅鱷魚，一些香港沒有見過嘅馬騮品種等。此外，園區入面包括免費乘坐的觀光小船，喺船上可以遠望犀牛，長頸鹿，獅子等等。如果願意付出 SGD5.00 的話，更加可以坐上亞馬遜河探索小艇，在小艇上可以看到水豚，美洲豹，紅鶴等等。 最後入面有一個動物表演，入去嘅話大家千萬不要錯過 (財自覺得係河川生態園入面最值得觀看嘅節目)。
晚上大約六時嘅時候我哋就同生態園講再見，向著牛車水進發，去到牛車水，我哋當然就係醫肚仔最緊要，嗰度嘅熟食市場真係可以用誇張嚟形容，如果你每天都幫襯不同嘅店舖的話，都唔知要用幾多個月先至可以食得曬。 最後我哋分別叫咗海南雞飯，一啲特色炒飯，肉骨茶等等... 晚餐過後又係回酒店休息嘅時間。
好快趣踏入旅行嘅最後一天，嚟到新加坡，我哋當然會去新加坡嘅地標--魚尾獅公園。 由於係最後一天我們早上check out，食過早餐之後，乘搭 MRT 到 Clarke Quay 站，然後沿住河邊慢慢散步進入魚尾獅公園 (這個不是最直接嘅方法，不過可以享受沿途嘅河邊風光)，由於天氣不太熱也不太冷，吹著涼涼嘅風散步走河邊，都幾寫意㗎。行下行下就去到魚尾獅公園，嗰度話曬都係新加坡嘅地標，逼滿咗嚟自世界各地嘅遊客，與魚尾獅拍照。 其實呢度都好細下，逗留咗一陣之後我哋都慢慢離開，走去我哋昨天去過嘅地方--牛車水，嗰度可以以平價買到好多手信畀香港嘅朋友，感覺就係好似香港嘅女人街咁樣 (不過比較企理啲，排檔與排檔之間冇咁大壓迫感) 行下行下，買下買下，我哋就要向住機場出發，其實喺新加坡去機場係可以坐 MRT 去嘅，所以都比較容易預到時間，如果有機會嘅話財自會再到新加坡旅遊，到時一定會帶埋細女去啦 ^_^
