走佬去馬來西亞 day2

第 2 天早上，我地瞓到黃朝百晏，九點幾先起身，簡單梳洗之後，本地朋友已經喺我哋民宿門口等待我們第二天的旅程。 第一個去嘅地點，就係會合當地另外一個朋友， 之後我哋一行六人去搵早餐食，當地朋友帶我哋去咗一間叫做日日升嘅餐廳 ( 怡保市No.15, Jalan Center Point 2, Center Point)，裝修唔係好豪華，食物嘅外表可能唔係好吸引，但裏面食物嘅質素畀喺好多香港嘅餐廳更好，你睇下我哋食乜嘢? 冇睇錯，當地人嘅早餐就係食呢啲。

食個早餐之後，我哋就去參觀了解一下當地嘅國際學校，我哋嘅旅行團就係去參觀國際學校同埋當地嘅物業，正常你哋一般嘅旅行團都唔會有這樣嘅行程安排吧 ...  第一間參觀嘅國際學校是 Tenby Schools Ipoh  (https://www.tenby.edu.my/ipoh)，學校嘅資料我唔講喇，有興趣嘅話自己睇啦。 

參觀完學校之後就去咗第一個新樓盤(唔好意思! 唔記得咗實際地址)，簡單講一下，這個單位大約馬幣 68萬左右， 

由於財自水土不服，睇樓之後要回到民宿休息一下，我嘅朋友就繼續佢哋嘅睇樓行程，我就喺民宿 zzz。

幾個小時之後，朋友回來民宿接我去食晚餐，我就跟車去咗一個不知名的大排檔，食到捧住個肚離開，真係要講多次又平又好食，第二天嘅行程就到呢度啦。

走佬去馬來西亞 day1

中午12點喺香港國際機場出發，經過四小時嘅飛行時間，就到達馬來西亞嘅首府吉隆坡國際機場，

由於一行五人仍然未吃午餐的關係，落機嘅時候急不及待尋找可吞吃的，一去到離境大堂第一間見到嘅餐廳就係舊街場白咖啡 (老闆沖咖啡沖到變咗上市公司，聽聞已經賣盤了，真係如果你很努力的話做乜都可以做到你發達)，

簡單食個午餐 / 下午茶之後，

就去我哋預先租私家車嘅店舖取車，圖中見到就係陪咗我哋五日嘅七人車 (HKD1,000左右，5天)。

馬來西亞嘅汽車都係右軚嘅，道路嘅設計跟香港基本上係一樣，只要你有個國際車牌就可以輕鬆駕駛，不過今次有本地朋友都唔輪到財自揸車喇 (完全唔識路叫我都唔知點，哈哈)。 經過大約三四個小時嘅行程我哋終於到達怡保(如果唔係塞車嘅話應該可以快一小時)，到達怡保嘅時候已經係晚上八九點左右我哋又開始搵我哋嘅晚餐，本地嘅朋友帶我哋去咗一間叫做東區旺角茶餐室嘅餐廳，

佢話呢度係當地好出名嘅食街，去到咁出名嘅食街梗係要叫一啲地道特色嘅美食--魔鬼魚，超級超級好食，魚肉非常嫩滑，連平時唔食魚嘅財自都喜歡左佢，哈哈! 食過晚餐後就去到當地朋友預先幫我哋安排嘅民宿休息，

準備第二天的行程。

走佬去馬來西亞

走佬去馬來西亞

最近五個多月來嘅反送中運動，使到財自對這個出生地怕怕， 係時候思考一下移民 / 移居嘅課題，喺眾多國家地區裏面，財自嘗試研究一下是否可以移居馬來西亞。 由於從來未去過這個國家，所以現時有嘅資料都係從網上或者朋友口中得知。

65歲以上人口

香港        17.7%(2019年)

馬來西亞  6.5% (2018年)

入息中位數

香港              HKD$18,700.00 (2019年)

馬來西亞         HKD$6,900.00 (2019年)

失業率

香港            2.9% (2019年8月)

馬來西亞     3.3% (2019年9月)

GDP增長

香港           +0.5% (2019年6月，財自估計今年很大機會是負數) 

馬來西亞   +4.4%   (2019年9月)

通脹率

香港            3.2% (2019年9月)

馬來西亞     1.5% (2019年8月)

睇完以上一堆數字，其實冇乜大意思，其中最吸引財自眼球嘅就係佢哋嘅人口結構與及語言。眾所周知香港人係全球年紀最老嘅地區，平均壽命達到男82.17歲及女87.56，而馬來西亞平均壽命是74.50，如果一個地區很大比例嘅人口都係老人家嘅話，這個地區經濟就唔會再有活力 (見到日本就知道，佢哋有一個迷失的30年)，由於馬來西亞地區嘅人均年齡非常年青，只有28.6歲，即係表示呢個國家仲有大把發展動力。 而且財自懂得嘅語言非常有限，最熟悉嘅只係廣東話，宏觀全世界可以用廣東話生存嘅國家 / 地區，除了香港以外就係馬來西亞，因為該國家嘅華人比例達到23%，而當中嘅華人絕大部分也懂得廣東話，即係話如果你只懂得廣東話嘅話，喺馬來西亞絕對係生存得到 (財自認識嘅馬來西亞朋友佢哋講嘅廣東話基本上同香港人有99%相同)， 由於這兩個大原因，驅使財自想去這個國家了解一下。

財自今日會飛去馬來西亞實地了解一下當地的生活，是否適合一家移居當地，起飛之前在香港的樓宇展銷廳中了解一下當地物業的情況，昨天就去了雅居樂天匯的展銷廳，不過有些事情比較失望就係主力負責馬來西亞樓宇的朋友竟然不懂得回答財自嘅簡單問題，其實我只係問咗佢天匯行去阿羅街有幾遠呀，而家這個樓盤有幾多仍然未售出(該銷售人員說不可以公開)... 既然佢都唔係十分了解，我都係到當地自己了解算數。 好彩今次唔係我一個人起飛，而係有五個大男人一同去到當地了解一下，今晚寫住咁多先。